Uwch Swyddog Coedwig

Mae’r Tîm Gweithgareddau Coedwig yn gyfrifol am reoli Ystad Goetir Llywodraeth Cymru yn gynaliadwy i fodloni achrediad dan Gynllun Sicrwydd Coetir y DU ac ISO14001 ac i gyflawni Rheolaeth Gynaliadwy o Adnoddau Naturiol. Mae’r tîm yn rheoli coetiroedd Llywodraeth Cymru yn ardal ddeheuol y Canolbarth (Gorllewin) sy’n ymestyn o Aberystwyth yn y gorllewin i Lanymddyfri yn y dwyrain. Mae’r rhain yn cynnwys cymysgedd o flociau ucheldirol ac iseldirol gan gynnwys gogledd a chanolbarth Tywi, Cwm Berwyn, Llanbedr Pont Steffan, Cross Inn, Tarenig, Myherin a Chwm Ystwyth.

Mae rôl yr Uwch Swyddog yn allweddol ar gyfer datblygu cynlluniau tactegol i gyflawni rhaglenni gweithredol blynyddol. Bydd gofyn gweithio’n agos â thimau o fewn CNC yn ogystal â chyflenwyr, cwsmeriaid a rhanddeiliaid i sicrhau bod y cynlluniau hyn yn cael eu cyflawni ar amser a hefyd eu bod yn bodloni’r safonau ansoddol ac yn rhoi gwerth am arian.

Disgwylir i’r unigolyn wneud y canlynol:

• Datblygu cynlluniau pum mlynedd tactegol a fydd yn cynnwys llwyrgwympo, teneuo yn ogystal ag addasu i ddefnyddio Systemau Coedamaeth Bach eu Heffaith, ailstocio, rhaglenni sefydlu a chynnal a chadw.
• Cynhyrchu proffiliau cyllideb blynyddol mewn cydweithrediad â’r Arweinydd Tîm ac adrodd yn rheolaidd ar y cynnydd.
• Asesu Cynlluniau Adnoddau Coedwig strategol arfaethedig i sicrhau bod ystod eang o amcanion yn cael eu gweithredu i fodloni Safon Coedwigaeth y DU.
• Cefnogi’r tîm ehangach o ran rheoli gweithrediadau pan fo angen.
• Cymryd cyfrifoldeb dros reoli data isadrannol.
• Rheoli prosiectau penodol pan fo angen.

Bydd yr ymgeisydd llwyddiannus yn gallu arddangos ei fod yn llawn cymhelliant a bod ganddo syniadau arloesol.

Os hoffech ymweld â’r safle i drafod y rôl yn ogystal â gweld yr amgylchedd gwaith, mae croeso i chi gysylltu â ni.

Rhaid cael trwydded yrru lawn y DU.

Cyfrifoldebau

Mae eich cyfrifoldebau’n cynnwys:

• Gweithredu fel arweinydd technegol Cyfoeth Naturiol Cymru ar gyfer sectorau neu faterion technegol penodol.
• Cymryd rhan yn y gwaith o ddatblygu cynlluniau gwaith tîm a gweithredu unrhyw gamau y cytunwyd arnynt er mwyn cyfrannu at gynllunio busnes. Lle y bo’n briodol, gweithredu fel arweinydd Cyfoeth Naturiol Cymru ar gyfer sectorau penodol technegol.
• Bydd yn ofynnol i gymryd rhan yng ngrwpiau technegol/strategol Cyfoeth Naturiol Cymru neu gynrychioli Cyfoeth Naturiol Cymru ar fforymau allanol.
• Rhyngweithio ag arbenigwyr eraill yn Cyfoeth Naturiol Cymru er mwyn hyrwyddo arferion cyson y diwydiant a phynciau arbenigol.
• Bod â chyfrifoldeb uniongyrchol am gyflawni rhaglenni a ddirprwywyd a rheoli cyllidebau y cytunwyd arnynt, yn cynnwys yr holl gydymffurfiaeth berthnasol a glynu at y broses gaffael.
• Mae gofyn cymryd rhan mewn gweithgareddau ymateb i ddigwyddiadau.

Cymwysterau, profiad a gwybodaeth

Gwybodaeth a phrofiad o’r canlynol:

1. Aelodaeth broffesiynol, neu o leiaf yn gweithio tuag at yr achrediad o’r pwnc perthnasol, o fewn amserlen y cytunir arni.
2. Profiad o weithio ar draws ystod eang o ddisgyblaethau rheoli tir.
3. Gwybodaeth am reoli coedwigoedd yn gynaliadwy, Cynllun Ansawdd Coetiroedd y Deyrnas Unedig a chynlluniau ardystio coedwigoedd.
4. Sgiliau hyfforddi a mentora.
5. Dealltwriaeth dda o brosesau a phwysau busnesau masnachol.
6. Y gallu i gyfathrebu’n effeithiol â busnesau a reoleiddir a’r cyhoedd, gan esbonio materion cymhleth ac ennill cefnogaeth drwy ddylanwadu.
7. Gwybodaeth a phrofiad helaeth o bob agwedd ar arferion coedwigoedd, gan gynnwys cynllunio coedwigoedd a gweithrediadau coedwigoedd.

Gofynion y Gymraeg:

Hanfodol Lefel 1 – Yn gallu ynganu geiriau Cymraeg a defnyddio ymadroddion syml

Noder: Os nad ydych yn bodloni’r gofynion lefel 1, hynny yw, y gallu i ddeall brawddegau sylfaenol ac ynganu enwau Cymraeg yn gywir, mae CNC yn cynnig amrywiaeth o ddewisiadau dysgu a chymorth staff i’ch helpu i fodloni’r gofynion sylfaenol hyn yn ystod eich cyflogaeth gyda ni.

Cymwyseddau

Noder – Bydd ceisiadau i’r rôl hon yn cael eu hasesu ar sail y cymwyseddau canlynol, ar y rhestr fer a’r cyfweliad. Rhowch enghreifftiau o sut rydych yn dangos y cymwyseddau hyn wrth lenwi’ch ffurflen gais.

Gwybodaeth a sgiliau hanfodol	Y gallu i ymgymryd â lefel uwch o dasgau ymarferol neu dechnegol, sy’n gofyn am wybodaeth/arbenigedd arbenigol. Mae’n bosib y bydd deiliaid y swyddi yn arbenigwr mewn ystod o bynciau sy’n ymwneud â’i broffesiwn. Bydd gan ddeiliaid y swyddi brofiad sylweddol o reoli contractau a byddant yn gallu cyflawni contractau o gymhlethdod, risg ac effaith lefel ganolig. Mae gwybodaeth am gyfraith contractau a rheoli/llywodraethu contractau a chanlyniadau hynny yn hanfodol. Bydd gan ddeiliaid y swyddi y gallu i ddatblygu briffiau a manylebau ar gyfer contractau. Bydd deiliaid y swyddi yn arddangos gwybodaeth dechnegol yn eu disgyblaeth a bydd ganddynt brofiad perthnasol. Bydd gan ddeiliaid y swyddi lefel uchel o wybodaeth am iechyd, diogelwch a llesiant, a phrofiad ohonynt yn ogystal â diogelwch cyhoeddus ac atebolrwydd cyhoeddus.
Gwerthuso gwybodaeth	Yn dehongli cynlluniau cyflenwi gweithredol y swyddogaeth ac yn deall eu cyd-destun o fewn strategaeth ehangach CNC. Y gallu i ddehongli contractau a chyfraith contractau acyn gallu asesu a gwerthuso ymholiadau am gontractau, heriau, a diffyg cydymffurfiaeth â chontractau. Y gallu i ddadansoddi, deall a chyfleu gofynion y sefydliad mewn briffiau a manylebau contract. Y gallu i ddadansoddi a dehongli amrediad eang o wybodaeth gymhleth, gan ddethol pwyntiau allweddol a’u cyfleu i unigolion ar bob lefel, a chyfrannu at ddatblygu polisi.
Gofynion gwneud penderfyniadau ac ymreolaeth	Cael ei arwain gan ganlyniadau disgwyliedig ond yn gallu penderfynu ar y ffordd orau o’u cyflawni.  Mae’n bosib y darperir arweiniad gan gymheiriaid ond mae’n debygol y bydd angen defnyddio ychydig o ddyfarniad neu greadigrwydd. Efallai y bydd angen newid blaenoriaethau oherwydd galwadau sy’n gwrthdaro. Bydd amcanion a thargedau ac ati yn cael eu hadolygu ar sail ganolraddol. Bydd deiliaid y swyddi yn cyflwyno rhaglenni gwaith sy’n aml yn sylweddol. Yn gyfrifol am wneud penderfyniadau annibynnol ar lefel weithredol gyda mewnbwn gan reolwyr llinell a chyfoedion. Yn meddu ar ddealltwriaeth o bolisi CNC a’u goblygiadau posibl i’r busnes.  Fel rheolwr contractau lefel ganolig, mae deiliaid y swyddi yn atebol am bob agwedd ar gyflawni a pherfformiad. Gellir gwneud penderfyniadau sy’n arwain at newidiadau yn y weithdrefn/arfer sefydledig. Bydd canlyniadau gwneud penderfyniadau anghywir yn cael effaith andwyol ar y sefydliad mewn perthynas â’i randdeiliaid allanol, megis sefydliadau partner, rhoddwyr benthyciadau, defnyddwyr gwasanaeth ac ati. Efallai y bydd penderfyniadau’n ymwneud ag amrediad eang o faterion ac ni fydd canlyniadau rhai penderfyniadau bob amser yn glir neu’n amlwg. Efallai y bydd problemau sy’n dod i’r golwg hefyd yn ymwneud â’r gwaith mewn rhannau eraill o’r sefydliad a gall y rhain fod yn amrywiol. Bydd penderfyniadau yn debygol o gael effaith ehangach na’r swyddogaeth neu’r adran uniongyrchol ac yn debygol o barhau dros y tymor canolig.
Effaith	Bydd gan ddeiliaid y swyddi lefel gymedrol o effaith a dylanwad, a fydd o natur tymor canolig yn gyffredinol. Bydd penderfyniadau a gweithredoedd deiliad y swydd yn dylanwadu ar eraill. Bydd canlyniadau ei benderfyniadau/gweithredoedd yn cael effaith tymor canolig yn fewnol neu’n allanol. Mae deiliaid y swyddi yn gyfrifol am gyflawni a chanlyniadau cyffredinol yr ystod o gontractau sy’n cael eu rheoli.
Cyfathrebu a chydberthnasau ag eraill	Fel sefydliad sy’n wynebu’n allanol, bydd deiliad y swydd yn gyfrifol am reoli’r cydberthnasau â sefydliadau a chontractwyr trydydd parti. Y gallu i gyfathrebu’n ysgrifenedig ac ar lafar, a/neu arwain prosiectau, sy’n gofyn am sgiliau perswâd da. Efallai y bydd y gwaith hwn yn cynnwys hwyluso a/neu gyflwyno mewn cyfarfodydd mewnol neu allanol, gan gynnig cyngor a mewnbwn fel sy’n ofynnol.  Bydd gofyn meithrin a chynnal cydberthnasau a rhwydweithiau da. Bydd deiliaid y swyddi fel arfer yn cynhyrchu dogfennau llai cymhleth, fel adroddiadau, cyfrifon, contractau ac ati. Bydd y cynnwys yn cynnwys lefel is o gyngor, arweiniad neu farn y bydd y derbynnydd yn gweithredu arnynt neu’n eu defnyddio, ac y byddai’n debygol o gael effaith andwyol pe bai’n anghywir neu’n cael ei ddrafftio’n wael. Y gallu i ddod o hyd i wybodaeth o sawl lleoliad trwy ymchwil a chymhwyso barn broffesiynol ynghylch sut y dylid dehongli’r deunydd, y mae ei effaith yn debygol o bara am dymor canolig.

Manteision gweithio i ni

Bydd y rôl hon yn cynnig amrywiaeth o fanteision, gan gynnwys:

• gweithio ystwyth a hyblyg (yn dibynnu ar y rôl)
• Cynllun Pensiwn y Gwasanaeth Sifil sy’n cynnig cyfraniadau o 26.6% i 30.3% gan y cyflogwr
• 28 diwrnod o wyliau blynyddol, yn codi i 33 diwrnod
• absenoldebau hael ar gyfer eich holl anghenion mewn bywyd
• manteision a chymorth o ran iechyd a lles
• awr les wythnosol i’w defnyddio pryd bynnag rydych chi eisiau

Gweler y manylion llawn ar gyfer yr holl fuddion y byddwch yn eu cael fel gweithiwr.